1-9-2021 港股通告簡評

數碼通(0315)業績

新鴻基系的股份,都是6月年結,所以這幾天陸續都會公佈全年業績,打頭陣的是數碼通,全年收入下跌3%,但盈利就升17%,若撇除去年的一次性減值,核心盈利微升1%。這幾年的數碼通都係一個穩字,唔特別好亦唔特別差,安心做一隻新地(0016)的現金牛,末期息派0.155元,加埋中期息0.145元,全年派0.3元,股息率約6.8%,係幾吸引,但如果睇返近五年的派息走勢,睇到係一個下降趨勢,股息率徘徊在5厘至8厘,咁派息額向下,股息率維持的話,即係代表用個股價調整囉,股價向下,收息都係得不償失,都係嗰句,買香港電訊(6823)仲好啦。

日清食品(1475)回購

昨天講過日清食品的回購,話佢進取地買,今日股價即時有反應,升3%收市,其實今日的回購價上限是5.48元,因乜事可以掃到5.58元收市呢,其實要計條數就好易明白。回購價上限,是以過去5個交易日的平均價,再加5%的溢價,作為今日回購價的上限,過去5天的收市價分別是5.14,5.15,5.15,5.3及5.4,平均價是5.228元,加5%上去,即係等於5.4894,最高回購價不可比這個數高,所以就是5.48元了。只要你剔除最遠嗰日的5.14元,以現價當作收市價,其實就可以好dynamic咁計到明天的回購價上限,咁5.15,5.15,5.3,5.4及今天的收市價5.58,平均價就是5.316元,加5%,就5.5818元,即係回購價上限是5.58元,亦即係今天的收市價,睇落好似好深,但換一個角度講,假設你知道間公司每日都會掃到回購價上限,只要你今日在5.58元樓下買到,明天公司包底會在5.58元回購,照咁計就係穩賺的。這個唔算係甚麼秘技了,有好多中小型股份做回購,真係會日日掃到上限,所以市場上有好多人,都識計呢啲數搵食的,要計條數好易架咋,用個excel輸入個幾個價,再入個現價就搞掂。