26-8-2021 港股通告簡評

香港科技探索(1137)業績

上半年盈利倒退,但經公司都有調整過的非現金項目後,其實係有輕微增長,如果唔計Shoalter科技業務的特殊開支,盈利仲升得多,不過這個都是數字遊戲,有盈利已經不是賣點,始終已經係第三個半年有錢賺,投資者的要求會更高,增長是放慢了,亦不是新聞,每個月的銷售數字已睇得到,所以未來成敗真係要睇衝出亞洲後的前景,這個另文再寫。

金川國際(2362)澄清通告

昨天中午最大的傳聞,係話寧德時代想入股金川10%股份,作價係市價的1.5倍,咁個傳聞一睇都知係流吧,寧德過萬億市值,金川只係百五億,真係睇中你的鈷礦的話,應該全購,唔會拎十零廿億出來搞搞震,寧德平時都係做實事(相對其他股啦),唔會吹太多風出嚟炒股的,但睇返個通告,公司話之前有同獨立第三方傾過發新股引入的可能性,不過在8月初已中止,其實呢個通告的隱含意思係,真係有同人傾過,至於係唔係寧德,就唔會講啦,不過金川在9月6日係會入港股通,屆時再放呢啲消息出來,就好好炒了。

平保(2318)回購A股

曾經是最強的保險股,這半年弱過藥煲,青冰冇詳睇佢的業績,亦唔打算睇,但回購A股的消息,應該可短暫刺激股價,將動用50-100 億人仔回購,回購上限價不高於 82.56 人仔,現時A股股價係 50.3 元,H股股價係 62 元,平保的AH差價係少有的貼近,所以如真係托得起A股股價,H股應該會受惠,即使唔升得多,應該都可以減慢插水的步伐。

小米(1810)回購

昨天都寫過,小米業績後可回購,昨天股價表現都較差,跌到24蚊邊,收市後睇回購通告,原來公司跌到24.2至24.45元先出手,46億子彈,昨天用了約2億元,股價大升就要靠特別消息,但這水平企得穩,回購應有助力。

信置(0083)派特別息

上次信置派特別息,係2018年2月宣佈,今次末期息有0.41元,特別息有0.28元,合共0.69元,折算都有5厘息喎,不錯啦,這半年來股價堅挺,無乜點跌,不過這半年做得最有soundbite的,應該係打針送樓,搶頭啖湯,亦都無多餘的condition,贏晒口碑。

希瑪眼科(3309)成立合資公司

希瑪眼科成立合資公司,發展兒童近視防控鏡片業務,近期這個產品在香港都幾hit,青冰屋企都應該有一副,早前基金經理黃國英都有推介一隻歐股,都係這個業務,叫EssilorLuxottica,有興趣可以望下,又是一隻今年的長牛股。

聲明:以上內容純屬個人意見及分享,並不構成投資、買賣建議或推薦
Credit: 青冰投資