27-8-2021 港股通告簡評

碧桂園服務(6098)回購

回購出手的第二天,回購了338萬股,約2億元,較首天的469萬股略少,騰訊及小米回購金額都係一兩億,而碧桂園服務都係買兩億元一日,但無論在市值及每日成交,碧桂園服務的兩億係重手好多,以星期四及五的成交股數,兩天都係約1300萬股,咁回購三、四百萬股就好有力了,下星期值得繼續留意。

小米(1810)回購

小米第二天作回購,今次回購價是24.75元至24.90元,不過金額就只有約1億元,比第一日的2億元係少咗,在3月及4月時,小米的低位偏離回購出手價不會太遠,首天回購價低位係24.2元,可以作為參考價,不過都要提返大家,這些大市值股的回購,通常很少會令到隻股有升浪,大部分都係托住在某一個區域,所以如想食大茶飯,相信未必係小米,只係下跌空間有數得計咁解。

比亞迪(1211)業績

比亞迪是三大汽車股中唯一中期業績是倒退的,不過收入是增長五成,但盈利就倒退近三成,相信星期一股價將要面對壓力,公司指原材料價格上漲,是影響盈利的主因。青冰近日留意到一個消息,Elon Musk近日在twitter上表示,自己更喜歡磷酸鐵鋰電池,因為可以充電至100%,而三元鋰電池只建議充電至90%,而美國的model3客戶,如果想提前拿到車,可以選擇來自中國的磷酸鐵鋰電池。又咁啱,刀片電池就是磷酸鐵鋰電池,這亦是早前炒作比亞迪的原因。相信日後最重要的消息,都係分拆半導體在國內上市,及刀片電池究竟有冇供貨畀Tesla,業績的倒退,相信只會短暫影響股價。

東方電氣(1072)業績

因為近日氫能概念喪炒,東方電氣受惠,而今次的業績都唔錯,收入按年增28%至227億人仔,中期盈利增41%至13.5億人仔,而對比去年下半年,收入都增16%,盈利增48%。清潔能源設備及再生能源設備,是公司的主要收入,佔近六成,亦是最賺錢的分部,而可再生能源的收入比去年更上升了148%。新能源是未來國策,原材料價格上,都怕阿爺會出手打壓,但要發展此業務,設備無可能唔用吧,亦不會打壓,所以這是青冰看好的原因,亦是近期青冰難得捉得到的尾巴,不過就早食咗,業績前腳軟未敢撈返,下星期都要睇啱位再出手。

中國旭陽(1907)業績

上半年收入按年增1.2倍,盈利增3.8倍,而對比去年下半年,收入增55%,盈行亦增25%,算係一份好好的業績,股息都有0.123元人仔,都幾善待股東。同樣是氫能概念,但今次的業績就全靠焦煤帶起,所以青冰早前都話,這股概念性較重,相比起東方電氣,旭陽係進取好多,但暫時而言,又唔見到佢股價有概念性炒上,希望好快就追到落後啦。

中國玻璃(3300)業績

早前盈喜話賺3億人仔,結果開出來係3.02億,中期息派0.05港元,年度化市盈率都是十倍多少少,相對於新晉藍籌信義玻璃(0868),同樣都係十倍多啲,咁中國玻璃的吸引力,就會是被收購的機會,信義玻璃全購失敗後,已決定在市場掃,最後申報時係持有7.09%,再睇近期的股價表現,應該好快申報持有8%了,如果再出現上星期大市急插的市況,中國玻璃係唔錯的選擇,因為低位信義玻璃會繼續買。

栢能集團(1263)業績

此股不嬲都唔易玩,就睇佢6月發盈喜話半年賺9億元,以廿億市值的股票,真係狂賺喎,但盈喜那天追入的話,全部變蟹,坐到近兩日先返家鄉。最後條數係賺9.3億元,增長28倍,每股派息0.84元,算係豪派喇,股息率14厘,display card在上半年供求失衡,顧客接受到加價,所以大賺,而公司都好坦白講,是受惠crypto價格上升而採礦活動增加,所以都提醒股東如果日後crypto需求急跌,又會變返早幾年咁,存貨累積,價格下滑,之後公司經營又會困難。總括嚟講隻股的業務係比較易睇,得閒留意吓電腦新聞就會了解,但隻股的性格係不嬲難捉,青冰寧願skip呢隻。

中金(3908)業績

中金份業績青冰就無睇,最值得一提係早前忽然延遲公佈業績,只係提及會在8月31日前會公佈,咁星期五中午就忽然發通告,話星期五會公佈喎,青冰真係第一次見出通告係話今日出業績嘅。

聲明:以上內容純屬個人意見及分享,並不構成投資、買賣建議或推薦
Credit: 青冰投資