30-8-2021 港股通告簡評

美團(3690)業績

美團次季虧損32.5億人仔,較預期為少,而收入就略高過預期,而上半年係蝕82億,換言之次季係比首季有進步,蝕少咗,同騰訊(0700)一樣,現是最困擾的未必係業績的好壞,而是好多失驚無神的監管及打壓。雖說業績唔重要,但都略講幾句啦,睇大數,外賣收入231億,到店及旅遊86億,新業務120億,而外賣就貢獻了24億盈利,到店及旅遊有36億,新業務係蝕92億,咁一睇就知邊度出問題,新業務就係社區電商,這板塊要流幾耐血,青冰唔識睇,但現時阿爺打壓的,係有盈利的外賣業務,及社區電商要履行社會責任云云,所以就咁睇個大數,就知美團有排煩,所以,都唔再花時間詳情睇了。

東岳(0189)業績

東岳在6月時曾發盈喜,指首五個月的盈利,同比增長超過50%,今日業績正式公佈,中期盈利增長49.3%,達6億人仔,都可以叫做跟預期相若,去年全年賺7.7億人仔,相比之下今次上半年肯定係勁啦,之不過此股六月底時是6.50元,今日收市價係23.55元,短短兩個月急升2.6倍,全靠北水推動,肯定已經預先炒咗盈利因素。那堆化學原料,氟、硅、膜及氫,是業務的重要佈局,可惜青冰就唔係太熟悉,所以戰友見青冰近期玩氫能概念,都係以設備為主,唔熟悉係其中一個因素啦,其次係這些原料升得太急,始終都會引來打壓原料急漲價的風險。

小米(1810)回購

今日第三日,回購價介乎 24.55 元至 24.85 元,共動用9913萬元,似乎每日大概買一億係策略嚟,除非好似第一日咁急跌,先會買兩億元。

萬洲國際(0288)回購要約結果

萬洲早前宣佈以每股7.8元,回購19.2億股,要約在今日下午四時截止,最後有82.8億股接納要約,以公眾持股97.1億股計,有超過八成半的公眾股東持股接納,咁都好正路呀,現價只係6.31元,回購有兩成溢價呀,不過最後超額得咁犀利,股東們大概只有23%的股份可獲回購。回購完成後,大股東及一致行動人士的持股比例由34.13%增至39.23%。

雲頂新耀(1952)宣佈將會回購

公司決定會動用不多於1億港元回購股份,雲頂新耀在去年10月上市,招股價55元,上市時集資約40億港元,初段股價表現都理想,一度高見104.8元,相比起其他半新股,雲頂新耀都算頂得耐,一直去到上星期才跌穿招股價,睇嚟董事局都好在乎個招股價,一穿就公佈回購。

聲明:以上內容純屬個人意見及分享,並不構成投資、買賣建議或推薦
Credit: 青冰投資