31-8-2021 港股通告簡評

江南布衣(3306)業績

全年收入按年升33%,盈利升86.7%,早前盈喜係話盈利會升8成,算係輕微高過啦,末期息派0.72港元,特別息0.39元,合共1.11元,計埋中期息全年就有1.50元,折合是約8厘息。生意好,經營所得的現金流大升,屬健康,收到嘅錢沒有去亂用亂買股票,放在銀行做定期,仲派特別息,正經公司善待股東,不錯啊。

希瑪眼科(3309)業績

中期收入升99%,中期虧轉盈賺1371萬元,以一間90億市值的公司來說,真係太少。7月開始做了三個新發展,收購香港腫瘤診所,收購香港牙科診所及成立合資公司設計及生產兒童近視防控鏡片,前兩者有點不倫不類,話晒間公司係以眼科行先嘛,而兒童近視防控是一個大市場,亦都配合公司個主題,值得期待。

五菱汽車(0305)業績
去年尾喪炒的五菱汽車,唔知大家有冇印象,若不是今日出業績,青冰都忘記了佢嘅存在,當日係炒作電動車,由五毫子炒到4.43元,隨後配股,大製作完美落幕。8個月過去,新能源汽車仍然好有炒味,幾隻大車股仍強勢,深受北水追捧,但五菱汽車呢,股價得返1.5元,中期業績仍然虧損2100萬,雖比去年1.98億大幅收窄,但講真,一間蝕緊錢的車股,博小鵬(9868)及理想(2015)不是更好嗎?點解要揀五菱汽車呀?

完美醫療(1830)以股代息定價

早前全年業績的0.12元末期息,0.13元特別息,可以股代息,上星期除淨後用5天平均價作為以股代息定價,最終定為6.476元,合資格股東可在9月23日前選擇要現金定要股,股份會在10月18日存入戶口可作買賣。去年老細歐陽醫生,是在股票入戶前幾天,才公佈全數選擇以股代息,然後就掀起升浪,青冰相信歐陽醫生最後都會選擇要股票,而這段時間股價可否回勇,就睇公司出通告谷價的頻率了。

碧桂園服務(6098)回購

連續第四天回購,不過銀碼就由首兩天的三、四百萬股,跌至這兩天的四、五十萬股,所以股價都弱返,今日的入市價係59.05元至59.5元,似乎係上午開市初段出手,接近中午時一度低見56.60元,而且全日大部分時間都在58蚊樓下,點解回購得咁奇怪,高位買完就收手,低位又唔去買呢?

騰迅(0700)回購

騰訊回購就正路好多喇,全日買咗22萬股,入市價係447.4元至477元,今日股價係先插水後反彈,低位447.2元,高位481.20元,對比返個回購價,真係無論高低,都係按策略買,買夠一億元就收手。

日清食品(1475)回購

日清食品昨天業績,提過會回購支持股價,今日立即出手,輕輕買咗17.2萬股,最高價買到5.42元,比今天的回購價上限5.43元只差一仙,算幾積極,今早睇大摩報告,內文提及管理層認為下年有機會派特別息,但青冰睇完成份中期業績,都無特別息呢幾隻字,相信大摩唔會老吹,可能在分析員會議時暗示過吧,所以下年公佈全年業績時,要多加留意喇。

聲明:以上內容純屬個人意見及分享,並不構成投資、買賣建議或推薦
Credit: 青冰投資