解讀美團(3690) 2022Q3業績：騰訊派美團可能走寶

又要講開場白：一如我上篇文預測，美團今季真係整體做到有經營利潤，但新業務仲有虧損，新業務要有經營利潤，可能要等到2023年底。

老本行持續有動力
1. 美團而家係形成緊雙增長點格局：老本行核心業務（外賣、到店、酒店、旅遊）繼續有增長，Q3做到人民幣（下同）463億收入，同比、環比都唔失禮，分別升24%同26%。
2. 經營利潤93億，環比升12%，同比好叻仔，升121%。經營利潤率雖然比上季回咗2個百份點，但都有20%，係近7季第二高。
3. 即係老本行做咗咁耐，仲係維持到強勁勢頭同盈利能力，呢個係其中一個市場睇到嘅增長點。

新業務開始轉勢

4. 而今季新業務一樣亮眼，收入163億，創新高之餘，環比重拾增長動力，升15%（佢Q2環比係有些微倒退），而同比升幅好強勁，升39%。
5. 新業務以往弊病係收入升得多，成本費用升得仲多，以往有一兩季試過蝕成100億，好令人懷疑佢究竟做唔做到盈利。但到今年Q3，當收入升39%時，費用只係升7%，呢個係我覺得成個Q3新業務最亮眼而未必人人睇到嘅地方！
6. 呢個係轉勢嘅跡象：以往燒錢無上限，而家經營開始成熟穩定咗，做咗咁多季、要試錯嘅都應該試哂，錢唔會再瘋狂白燒啦掛。即係如果有心係去攪好個業務（唔係只做大個生意用嚟講故事，但係勁蝕錢）幾季時間，一定會睇到嘅轉勢。
7. 管理層已經吸收咗唔少經驗去提升效率，反映緊喺呢個業務規模下，增加邊際收入所需嘅邊際成本越嚟越細，正正就係走向產生盈利嘅業務模式。
8. 新業務Q3雖然仲係經營虧損68億，同上季持平，同上年Q3嘅蝕100億，就收窄咗32%。
9. 所以雖然仲未賺錢，但只要keep住個趨勢，收入持續雙位數增長，而成本增長維持喺個位數。2023年年底做到有盈利，並唔出奇，呢個就係第二個增長點。
10. 無人肯定最終新業務幾時真正賺錢，不過憑佢呢刻嘅進步同狀態，我都幾肯定可以講新業務係值得做，唔係得個吹字。

今季轉虧為盈嘅另一個主因

11. 有人歡喜有人愁，當美元強勢，美元記帳嘅美股巨企牙痛咁嘅聲，個個都話強美元攪到海外業務賺少好多。
12. 相反，用人民幣記帳嘅美團就會受益。佢地美元資產喺美元升值後，轉換人民幣做財報時，換到更多人民幣金額，所以今季確認咗成17億嘅滙兌收益。
13. 點解會有咁多滙兌收益？佢應該無乜海外業務架？
14. 係，佢無。佢係因為揸住好多美元定存，Q3業績無詳細披露，但2021年報顯示，2021年12月31日有880億定存，其中500億係美元，另外非定存現金都有150億係美元。
15. 而Q3，佢披露咗總定存金額都係880億。照計三季之內，定存組合變化應該不大，所以今年美元升得咁勁，佢應該呢幾季都賺匯差。

16. 不過Q1、Q2都冇講賺幾多、可能Q1、Q2都係10億以內，但Q3有成17億，賺得最多唔可以唔再披露。
17. 擺美元定存都合理，因為佢有500幾億美元計價借款、票據。就算經營要洗人民幣，都唔使一吓子轉哂美元做人仔，因為美元仲升緊。
18. 而且都要準備美元還息、還債。總之佢計好哂數，知道幾時要用錢支付人民幣成本費用，幾時還美元息，就無問題。
19. 經營利潤今季係9.9億，純利有12億，所以如果唔計強美元而產生嘅17億匯兌收益，美團今季整體都仲係經營虧損（9.9-17= -7.1）同淨虧損（12-17= -5）。
20. 即係都係虧喎？不過望番上年同季，其實已經好大進步，上年同季，經營虧損係100億，淨虧損都係100億，就算唔計俾阿爺反壟斷法罰咗20億之後，都有成80億虧損。

Q4經營情況預測

21. 美團Q3業績喺11月25日出，即係第4季其實已經過咗3份2，所以Q4經營情況，美團已經大致掌握。
22. 喺當日嘅記者會，管理層表示9月開始，中國疫情中、高風險地區又急劇增加，到10、11月相關風險地區再比9月又要增加，而且預計12月又會比11月再差。
23. 情況好似今年4、5月咁樣，所以佢地預期Q4嘅經營情況又會因為疫情有明顯負面影響，核心業務可能會無Q3咁強嘅增長動力。
24. 管理層嘅說法試圖將美團業務講到有明顯嘅季節性來避免直接指向防疫政策影響經營。好小心！
25. 佢地話：疫情、病菌會因為第四季寒冷天氣而升溫，防疫封控政策就因為咁先再收緊，繼而影響佢業務。
26. 但佢地相信一去到天氣回暖嘅季份，佢地嘅經營情況就會好轉。而家呢個勢，我都覺得美團業務有好強嘅季節性，但就唔知係唔係純天氣關係，係就易預測好多。但可以肯定嘅係當防疫手段收緊，佢都係無運行。

總結

27. 所以，呢隻嘢，本身係好有潛力，新業務雖然未有盈利，但就明顯向住呢個方向進步緊，市場全部都睇到。如無太大意外2023年底有機會做到有利潤。
28. 唯一嘅變數同意外當然就係管理層所講嘅季節性因數啦，呢吓真係無人估到。但掉番轉講就係呢隻嘢喺目前嘅趨勢下，都唔難估佢做得好唔好。疫情無事無幹，佢係做得好好，一收緊就無運行。所以嚟緊第四季預咗會做得差啲，但係拉長少少睇2023年我都覺得增長好有動力。

相關文章

迎接美團(03690)的黃金坑
借京東為鑑 美團未必驚Prosus

聲明：以上內容純屬個人意見及分享，並不構成投資、買賣建議或推薦
Credit: CFO講年報