借鑑京東看美團

港股在今年的首三個星期，已累升11.4%，而去年被唾棄的科技股，今年出閘領放表現神勇，騰訊(0700)累升23.5%，阿里巴巴(9988)升34.8%，兩者都大幅跑贏大市，之不過美團(3690)就斯人獨憔悴，逆市跌3.8%。隨著內地抗疫政策急轉，逐步開放與世界接通已是共識，有旅遊及酒店相關業務的美團，理應最受惠，但股價不升反跌，大家都眾口一辭，因為騰訊分派美團，南非股東講明一股不留，所以有排都唔識升呀。


美團被實物分派，按常理分析應該沽壓沉重，在3月24日股票入戶口前都無運行，不過以上次騰訊派發京東(9618)的例子看，情況並非如此。去年11月青冰在收費頻道寫過一篇文章，當時分析過騰訊派京東一事，今次抄返出來參考。

騰訊在2021年12月23日宣佈實物派發京東，當時騰訊股價在425.7元，京東是259.6元，同日恒指收報23193點；至2022年1月20日除淨當天，騰訊是447.9元，京東是299.8元，恒指收報24952點，即係由宣佈至除淨，騰訊累升5.2%，京東升15.5%，恒指升7.6%。有關派發在2022年3月25日入戶口，適逢當月的港股美股急挫，由除淨日至派送日騰訊累跌24.4%，京東跌23.7%，同期恒指跌14.2%。去年6月南非股東Prosus忽然宣布會逐步減持騰訊，套現用作回購自身股份，亦同時披露已於6月24日悉售手上的京東股份，按當日的股價計一計數，騰訊從3月派送日起反彈7.8%，京東升9.2%，同期恒指反彈1.5%。

由宣佈至除淨，京東跑贏騰訊及恒指，由除淨至派送，京東又跌得少過騰訊，好喇由派送至Prosus披露已悉售，京東都係彈得高過騰訊及恒指，咁實物派送是否會令股價跑輸大市呢？今次騰訊派美團，由宣佈至除淨，騰訊係升24.4%，美團亦升17.6%，同期恒指升15%，頭一段無跑輸大市，但最近兩星期美團的確差啲，又剛好是除淨後走弱，但由現在到派送日還有兩個月，是繼續跑輸還是跟返京東的例子，實屬難料。

另外，散戶普遍認為Prosus會在3月收到貨之後才沽，實情係大戶要減低exposure，有很多方法，最易理解的就係已經開始借貨沽空，到3月收到貨才一次過還貨，再複雜一點就像巴巴的大股東軟銀，跟投行訂立預付遠期合約，投行在交易時已做對沖，要影響股價，應不會是派送日之後呢。

Prosus要沽係有好多玩法，時間性亦好靈活，老散很難估得準，既然京東都不一定跑輸，實不應將美團跑輸的責任，全歸咎於騰訊的派送呀。

聲明：以上內容純屬個人意見及分享，並不構成投資、買賣建議或推薦
Credit: 青冰投資