騰訊減持Sea套現

騰訊(0700)宣佈減持1449萬股在美上市的SEA Limited (SE),套現約242億港元,並表示擬長期維持於SEA的絕大部分股權,是次減持可釋放騰訊持有SEA的部份投資價值,提供資源以支持其他投資及社會責任項目,今次減持後,將會有六個月禁售期。

繼早前騰訊宣佈分派手持的京東(9618)股份後,這是一個月內第二次動作,兩者都是以「釋放價值」為目的,兩者同是電商,未知是否騰訊看淡這個行業呢?但應該跟反壟斷的關連不大,因為SEA收入近七成來自東南亞,照睇減持純粹睇錢份上,可能為咗「支持社會責任項目」籌集更多資金吧。

青冰早兩星期對派發京東這事,在文章分析,內裡有兩個重點,算是估中了一個。一,騰訊派京東,最大的得益者係南非股東Naspers,去年Naspers減持騰訊套現逾千億,但有三年禁售期,但派完京東後,Naspers就成手京東,又無禁售期,你話係唔係好大誘因套現呢;二,騰訊手持在美上市的股份,應不會作派送,直接減持來得更簡單,原因係,北水或港股的騰訊股東,派港股就簡單得多,可以自行沽貨,但派美股係幾咁複雜呢,當港股老散有美股戶口,交收程序都幾煩,但北水呢,北水計正係唔揸得美股啊,最後騰訊就要派完美股,幫你沽埋,再畀返現金你,頂,咁不如直接減持隻股,騰訊收返錢然後派息啦,今次減持SEA,應是這個原因吧。

既然減持美股來得簡單,那些未有在港上市的股份,就要驚驚了,今晚中概全跌,騰訊揸住的PDD及BILI都跌得特別多,前者應會直接減,後者已在港上市,有可能派街坊益大家,且看這個斷估又準唔準啦,至於快手(1024),由於上市未夠一年,作為主要股東的騰訊,上市時承諾了一年禁售,所以應該虎年先做得嘢,美團(3690)呢,暫時就最高危喇。

聲明:以上內容純屬個人意見及分享,並不構成投資、買賣建議或推薦
Credit: 青冰投資