中移動(0941)擁提速降費優勢

今時今日，港股最穩陣嗰隻我覺得係中移動。
1. 講啲基本嘢先，佢係中國三大電訊股龍頭。無論係收入、經營利潤率、股東應佔純利、5G套餐客戶數都係拋離中電信同聯通幾條街，下面個表講哂：


2. 最屈機係5G套餐客戶人數，中移動有4.7億，多過中電信2.1億同聯通1.7億好多。佢總移動客戶數係10億，現有用戶用開而轉5G plan，最大機會都會轉番中移動，所未來增長一定係嗰5億潛在新5G用戶。

現金流概念教學
3. 另外一樣無人能及嘅係佢嘅現金流。我先簡單教學一吓關於現金流概念。可以apply落所有上市公司。
4. 損益表純利係帳面上公司有權賺取嘅純利，但唔代表公司真係已經收晒純利啲錢，因為做生意會有賒數，所以會有應收帳款，因為你有權收嘅錢（應收）係呢一刻未收到……
5. 好多時間公司話帳面賺錢，但實際收唔番啲賒住先嘅錢，其實係冇意思嘅。因為會有信貸風險，最後人哋走數唔找錢俾你，就要做壞賬，咁就應分類為費用。
6. 如果你俾我揀兩間公司，一間賺好多錢但現金流係負數，一間係蝕錢，但現金流係正數，我會揀後者。因為現金流先至係間公司嘅血液，你要保持現金流去支付你嘅費用、債務，間公司先可以生存。如果唔係，你未賺純利之前，你間公司已經因為還唔到債，找唔到費用而比人告到執笠。內房而家就係呢個狀態。

7. 一間公司嘅現金流係會分三種：一、經營性現金流，二、投資性現金流，三、融資性現金流。
8. 經營性現金流，即係所有關於公司日常做生意嘅收入、支出、人工、燈油火蠟嘅現金流入、流出。如果間公嘅經營性現金流係浄流入，代表你做生意已經好勁，因為你可以自負盈虧，從你日常經營活動裏面令到間公司增加現金水平，呢個係你開公司嘅最終目的。
9. 投資性現金流，係代表非日常經營嘅現金流活動。係關於資本性嘅（固定資產）現金流出、流入。例如買廠房、買設備，呢啲現金支出係唔會喺當年會計年度入哂費用，因為呢啲資本支出，長遠係會令間公司產生更多經營性現金流入。所以今日嘅投資性現金流流出，係為將來產生經營性現金流流入。
10. 融資性現金流，就係問銀行借錢或者叫股東科水增資。係因為間公司喺經營性現金流未能夠自負盈虧，或者就算有可以自負盈虧，但都無多餘嘅錢去擴大規模，所以要銀行貸款或者有股東增資注入足夠現金，即係血液，俾間公司維持生命同埋成長嘅方法。
11. 當然人哋俾錢你係有代價嘅，股東科水係要俾股息、銀行借錢要俾利息。一間公司做得勁嘅，就係自己做生意，產生足夠營經性現金流嘅淨流入，可以俾自己生存到，唔需要再借錢。
12. 而做得極致嘅，不過唔多。就係自己做生意所產生更大量嘅營經性現金流淨流入，去俾錢找埋你平時買固定資產嘅嗰條數。因為你買固定資產，其實就係擴大你嘅經營規模從而賺取將來更多嘅經營性現金流，之後再買固定資產，咁樣就會形成生生不息，越做越大嘅效果。

中移動做到極致
13. 以2021年全年為例，中移動一年經營性現金流淨流入3000億。因為佢本身就有超過10億嘅用戶，所以一年有8000億收入，扣除經營性現金流支出，都仲有3000億剩。咁佢一年起通訊基站都唔使2000億，即係話由於佢日常經營嘅生意規模太大，仲大過佢每年所需要投入嘅資本性設備開支，所以每年由經營生意嗰度所產生嘅現金流，足以支付佢每年去起基站嘅錢都仲有剩。

14. 因經營現金流已經夠所有現金支出，所以佢係我極少數見到上市公司係唔需要舉外債（有啲上市公司係因為無人肯借錢俾佢，所以無外債），亦係三大電訊商唯一冇外債嘅；所以佢嘅融資性現金流活動除咗俾股息外，就無乜其他項目啦，因為根本唔使融資。
15. 一句講哂，中移動嘅現金流係教科書級數嘅健康狀態。穩陣過啲銀行股好多。

關於中美角力、美國制裁風險
16. 先苦後甜永遠係一件好事。2020年年尾，中移動需要喺美國退市，處於中美角力嘅風口，股價跌到落39。不過長痛不如短痛，經歷美國退市，之後回A。咁樣就解決哂美國制裁嘅風險，同一時間又開發左A股市場嘅資本。已經唔需要再好似而家嗰二百幾隻仲喺美國上市嘅中概股日日喺度擔驚受怕俾人搞。
17. 美國退市，只係從資本市場上避開咗美國佬搞你，但係業務經營上你有海外業務，人地一樣可以搞你。但sorry，中移動呢樣嘢又係好屈機，幾乎99%都係中國業務，坦白講美國佬想搞佢都搞唔到。當然我好保守，業務無海外嘢，咁資產呢？總資產少過5%係喺海外，而佢嘅美元現金餘額都係只佔佢總現金餘額2400幾億嘅1.8%。
18. 你唔同內銀嗰啲，話知你邊度上市，如果美國佬一制裁，唔俾用SWIFT，你望番俄羅斯啲銀行就知大獲，但中移動講真我真係唔係好諗到美國佬仲可以點樣搞到佢。

關於監管、政策市、國內經濟下行壓力
19. 最後講埋阿爺監管啦，好明顯除咗2015年開始講提速降費之外，到呢一刻你都無聽過阿爺有啲咩監管政策搞中移動。梗係啦，中移動係國企，阿爺揸70%股權，佢做咩要自己監管自己？所以呢一瓣又係hit唔到佢。
20. 佢有國家任務，就係提速降費，但係呢樣嘢已經存在咗6年有多，咁代表呢啲唔係新問題，反而已經變咗佢生意嘅一部份。股票市場、中移動、用戶都已習慣同接受咗，咁就唔係佢嘅一個潛在風險，
21. 國內經濟走下坡令到騰訊嘅遊戲、廣告業務，阿里巴巴嘅電商業務都開始倒退，內房都要靠降準降息去拯救，唔知救唔救到。但係中移動啲上網費電話費已經因為咁多年提速降費，已經好平，所以收入反而唔會有個重大倒退嘅風險。
22. 就係因為佢呢幾年長期都好平，ARPU人民幣50幾，就算經濟走下坡，（除非糧食都有問題，咁就無得講，咩都死），消費者最先會慳嘅、cut嘅一定唔係電話上網費，因為不嬲已經好平，除非唔上網，如果唔係你都唔好意思再叫中移動減價，而且你食、訓、柯都係要上網。所以如果經濟差，影響最少或者最慢嘅可能就係電訊業，所以中移動業績好難大起大落，你會計到數，喺呢啲亂世之中，我覺得佢係最穩陣，最強防守性。
23. 唔好唔記得佢仲有現價接近8%嘅股息，同埋下年會再提升派息比率到70%。

聲明：以上內容純屬個人意見及分享，並不構成投資、買賣建議或推薦
Credit: CFO講年報