31-8-2021 港股通告簡評

江南布衣(3306)業績

全年收入按年升33%,盈利升86.7%,早前盈喜係話盈利會升8成,算係輕微高過啦,末期息派0.72港元,特別息0.39元,合共1.11元,計埋中期息全年就有1.50元,折合是約8厘息。生意好,經營所得的現金流大升,屬健康,收到嘅錢沒有去亂用亂買股票,放在銀行做定期,仲派特別息,正經公司善待股東,不錯啊。
» Read more

30-8-2021 港股通告簡評

美團(3690)業績

美團次季虧損32.5億人仔,較預期為少,而收入就略高過預期,而上半年係蝕82億,換言之次季係比首季有進步,蝕少咗,同騰訊(0700)一樣,現是最困擾的未必係業績的好壞,而是好多失驚無神的監管及打壓。雖說業績唔重要,但都略講幾句啦,睇大數,外賣收入231億,到店及旅遊86億,新業務120億,而外賣就貢獻了24億盈利,到店及旅遊有36億,新業務係蝕92億,咁一睇就知邊度出問題,新業務就係社區電商,這板塊要流幾耐血,青冰唔識睇,但現時阿爺打壓的,係有盈利的外賣業務,及社區電商要履行社會責任云云,所以就咁睇個大數,就知美團有排煩,所以,都唔再花時間詳情睇了。
» Read more

27-8-2021 港股通告簡評

碧桂園服務(6098)回購

回購出手的第二天,回購了338萬股,約2億元,較首天的469萬股略少,騰訊及小米回購金額都係一兩億,而碧桂園服務都係買兩億元一日,但無論在市值及每日成交,碧桂園服務的兩億係重手好多,以星期四及五的成交股數,兩天都係約1300萬股,咁回購三、四百萬股就好有力了,下星期值得繼續留意。

小米(1810)回購

小米第二天作回購,今次回購價是24.75元至24.90元,不過金額就只有約1億元,比第一日的2億元係少咗,在3月及4月時,小米的低位偏離回購出手價不會太遠,首天回購價低位係24.2元,可以作為參考價,不過都要提返大家,這些大市值股的回購,通常很少會令到隻股有升浪,大部分都係托住在某一個區域,所以如想食大茶飯,相信未必係小米,只係下跌空間有數得計咁解。
» Read more

26-8-2021 港股通告簡評

香港科技探索(1137)業績

上半年盈利倒退,但經公司都有調整過的非現金項目後,其實係有輕微增長,如果唔計Shoalter科技業務的特殊開支,盈利仲升得多,不過這個都是數字遊戲,有盈利已經不是賣點,始終已經係第三個半年有錢賺,投資者的要求會更高,增長是放慢了,亦不是新聞,每個月的銷售數字已睇得到,所以未來成敗真係要睇衝出亞洲後的前景,這個另文再寫。

金川國際(2362)澄清通告

昨天中午最大的傳聞,係話寧德時代想入股金川10%股份,作價係市價的1.5倍,咁個傳聞一睇都知係流吧,寧德過萬億市值,金川只係百五億,真係睇中你的鈷礦的話,應該全購,唔會拎十零廿億出來搞搞震,寧德平時都係做實事(相對其他股啦),唔會吹太多風出嚟炒股的,但睇返個通告,公司話之前有同獨立第三方傾過發新股引入的可能性,不過在8月初已中止,其實呢個通告的隱含意思係,真係有同人傾過,至於係唔係寧德,就唔會講啦,不過金川在9月6日係會入港股通,屆時再放呢啲消息出來,就好好炒了。
» Read more

1 2 3 4 5 27