比亞迪不怕批股怕分拆

比亞迪(1211)在港股收市後宣佈配股,按市場消息,配股價介乎273.5元至279.5元,較今日收市價有5.8%至7.8%折讓,涉及5000萬股,集資約140億港元,資金將用作營運資金、研發及償還貸款。

比亞迪今年累升46%,跑贏同業吉利(0175)及長城汽車(2333),兩者今年分別累升2%及32%,再睇遠啲,自2019年底起,比亞迪累升663%,長汽升509%,吉利遠遠落後,只有77%。比亞迪本周二創歷史新高324.6元,周四公佈第三季業績,第三季賺12.7億人民幣,同比下降27.5%,首三季度賺24億,同比下降28%,以現時市值近萬億元(A股+H股)相比,係比較令人失望的,不過昨日股價最多也是跌4%,算有交代了。

增發H股,是需要經中證監審批,翻查記錄,比亞迪在去年12月作申請,至今年1月15日獲批,當時的條款係,核准增發不多於1.83億股,公司可以分次完成增發,不過每次相隔不得少於3個月,而每次發行不可少於核准股數的25%,核准有效期是12個月,換言之在明年1月15日便到期。在獲批後一星期,比亞迪亦進行配股,涉及1.33億股新股,每股作價225元,集資298億元。上次1.33億股,今次就5000萬股,加埋就剛剛好1.83億股,一股都無剩,用盡晒所有額度。

從好的方面去想,用晒額度代表未來一段時間不能再配股了,由於要中證監審批,要再增發時,首先要再作申請,批得嚟都要個零月,青冰無查證是否要等到今次有效期完結才可再作申請,如係的話,就有兩個多月的安全期,再者,今年兩次配股,籌集資金約440億元,加上早幾日港交所已批准比亞迪分拆比亞迪半導體往深交所創業板上市,由於今次分拆會視出減持出售資產,所以屆時有特殊盈利又會cap到水,應該有助減低百幾倍市盈率。

講開PE,按彭博資訊的預測,現價是2021年度盈利的149倍PE,全球最強的電車領導Tesla,是182倍PE,但Tesla在第三季度收入有137億美元,盈利是16億美元,相比之下比亞迪收入是543億人仔,盈利12.7億人仔,相形見絀,不過市場給予高估值,部分原因是比亞迪分拆半導體及電池業務,前者估值逾百億元,後者就未有消息,但全國最強的電池公司寧德時代,現時PE都係134倍,所以手執刀片電池的比亞迪電池,隨時可以超高估值上市,不過青冰反而擔心,將兩樣最有前途的業務分拆後,比亞迪會變成控股公司加汽車業務,大家都知身為控股公司,市場價對資產值多數有折讓,但純以汽車業務睇,就以上半年計,比亞迪賺十億,長汽賺34億,吉利賺23億,但估值就是天與地,所以單純批股未必能打死比亞迪,分拆完成後可能就是見頂時。

聲明:以上內容純屬個人意見及分享,並不構成投資、買賣建議或推薦
Credit: 青冰投資