解析四大內銀股

如果只睇基本數據，其實真係隻隻都差無幾。

PE：建行3.29，農行3.17，工行3.38，中銀3.18。
PB：建行0.38，農行0.34，工行0.35，中銀0.29。
Dividend Yield：建行9.29%，農行10.01%，工行9.14%，中銀9.91%。

1. 睇出面財經新聞講四大內銀，都係冷冰冰引述佢哋啲經營指標：淨息差、淨利息收益率、不良貸款比率、預期信貸損失撥備率、撥備覆蓋率等等。
2. 睇完你係唔會太有感覺，究竟邊隻相對表現好啲、風險低啲。
3. 如果真係要容易啲睇，我覺得要知道上面邊啲指標，係真正反映緊銀行嘅盈利能力。其實唔多，睇兩個指標：1）淨利息收益率及2）預期信貸損失撥備率，已經好夠。

先講最新中期業績
4. 建行總收入人民幣（下同）3904億，增長2.5%，淨利息收入3173億，增長7.2%；預期信貸損失撥備1033億，稅前利潤1924億，利潤率有49%。
5. 農利總收入3877億，增長5.8%，淨利息收入3002億，增長6%；預期信貸損失撥備1055億，稅前利潤1563億，利潤率有40%。
6. 工行總收入4274億，增長3.7%，淨利息收入3541億，增長4.5%；預期信貸損失撥備1336億，稅前利潤2091億，利潤率有49%。
7. 中銀總收入3136億，增長3.5%，淨利息收入2240億，增長7.3%；預期信貸損失撥備528億，稅前利潤1521億，利潤率有49%。
8. 四間內銀無論係總收入增長，淨利息收入增長都好接近。不過預期信貸損失撥備中銀就特別低。人地三間都千零億，佢就得500幾億，唔通佢啲客特別好信譽？

9. 工行同建行稅前利潤都差唔多，有2000億左右，利潤率除咗農行，得40%比較低之外其他三間都好接近，都係約49%。
10. 銀行股由於業務模式好傳統，就係吸收存款，借出存款，賺取息差，呢個就要睇淨利息收益率；
11. 而佢哋嘅成本，除咗一般較為穩定嘅經營費用外，預期有啲債仔唔還錢而要做信貸損失撥備，就係佢地最主要費用，亦都係好影響稅前利潤嘅一個因素。
12. 因為你望番point 4-7 除咗中銀，其他三間嘅預期信貸損失撥備都佔稅前利潤超過50%，係中銀得30%左右。但都係一個好大佔比嘅費用。

常用經營指標嘅真正含意

淨息差/利差
13. 利息收入利率 – 利息支出率=淨息差
利息收入利率=利息收入÷產生利息資產總額；
利息支出率=利息支出÷產生利息支出負債。
個息差愈大，代表收入同成本之間嘅空間愈大，係好事。不過只係一個籠統嘅數據，唔係直接反映緊個銀行借錢出去嘅貸款回報率。所以，大概睇下就ok。

14. 淨息差/利差大細，可以係銀行內部對資金存借經營管理能力嘅差異，同時都受到大環境、中央銀行係緊縮銀根，定係放鬆銀根政策；
15. 緊縮即係息差會擴濶，因為如果央行加息，銀行借錢出去嘅利率跟住加，但資金成本部份如果係固定息率，例如客戶定期存款，咁利息支出就會相對穩定，所以息差就會擴闊，但都唔會擴濶得好勁，因為定期會到期，下次吸收新存款，銀行就要俾多啲息率。
16. 如果唔係，人地去第二間銀行存錢，所以點解，唔知你有無留意，最近香港啲銀行會推出啲高啲嘅定存優惠，因為佢地想預早銷定利息成本，因為佢地預期卜利率會再升落去。
17. 而家中國就相反，係行緊放鬆銀根政策，銀行要減利率，個息差就會掉番轉進一步收窄。

淨利息收益率
18. 係一間銀行先以利息收入-利息支出=淨利息收入，再以淨利息收入÷產生利息資產總額，係真正量度嗰間銀行嘅現有產生利息資產嘅淨回報率（“淨”代表已扣利息支出）
19. 呢條公息同上面point13淨息差嘅分別，係份母只用產生利息資產，無用產生利息負債。
20. 呢個係真正資產回報率，個回報率愈大，就直接影響損益表嘅淨利息收入。
21. 就今次中期業績淨利息收益率，建行係2.09%，農行係2.02%，工行係2.03%，中銀係1.76%。
22. 睇落每間銀行嘅百分比差異都係零點幾個percent，中銀相對較低，連2個percent都做唔到。但係差異都唔係好大，影響有幾大呢？

23. 頭先講咗呢個百分比，係產生利息資產嘅回報率，即係可以簡單用產生利息資產總額呢粒數，剩呢個回報率，我地就會計到淨利息收入，即係直接入損益表嘅數。
24. 咁當你望返呢幾間銀行嘅總產生利息資產係幾多，就會知上面講四間銀行嗰少於1%嘅差異嘅淨利息收益率對利潤嘅影響係有幾大啦。
25. 總產生利息資產：建行係30.6萬億，農行係29.9萬億，工行係34.8萬億，中銀係25.7萬億。建行嘅淨利息收益率係2.09%，比中銀高出0.33%。
26. 做一個敏感性測試，就用呢個0.33%，當呢四間銀行淨利息收益率上升0.33%，佢地嘅淨利息收入就會: 建行多1000億，農行多987億，工行多1149億，中銀多847億。

27. 一開始提過，稅前利潤，建行1924億，農行1563億，工行2091億，中銀1521億。

28. 即係話淨利息收益率，只要有呢個少少三份之一%嘅差異，就會對成間銀行差唔多有超過成50%嘅稅前利潤嘅影響。所以呢個數據非常重要就算差0.1%對個盈利能力都好大影響。
29. 所以呢度建行嘅賺取淨息差收入能力係最高，而中銀係最差。

信貸風險

不良貸款
30. 由中國銀監會規定，將貸款按質素分為5個級別︰正常、關注、次級、可疑、損失。次級、可疑、損失都屬於不良貸款。最主要係睇債仔現況。不良貸款率當然就係將個不良貸款額除以總貸款額（銀行借出去嘅總額）。
31. 詳細定義我無研究，但我覺得都唔係好緊要，因為呢個不良貸款都唔係用嚟計入損益表做信貸損失撥備嗰粒數。又係一個籠統嘅數據，因為計入損益表做信貸撥備損失嘅數，大過呢個不良貸款好幾倍。

預期信貸損失撥備
32. 而真正計入損益表嘅係預期信貸損失撥備。呢個係包含咗會計準則概念再加估值概念，除咗睇債仔現況，仲會睇埋債仔未來12個月風險（低風險組別）或者成個貸款期嘅風險（高風險組別），所以叫「預期」，有前瞻性。係比不良貸款更加嚴謹、準確，睇下面個撥備覆蓋率你就會知。

信貸撥備損失率
33. 就係累積信貸損失撥備嗰粒數除以÷總貸款額。而每個業績期間，累積信貸損失撥備嗰粒數如果有增加 （可能係因為貸款額增加或者係信貸撥備損失率增加），增加部份就會入當期損益，所以係真正用嚟計落損益表反映信貸風險嘅嘅數。

撥備覆蓋率
34. 呢個比率就係反映緊point 31講嘅計入損益表嘅預期信貸損失撥備係不良貸款嘅好幾倍。因為簡單嚟講，呢個數嘅公式就係預期信貸損失撥備額÷不良貸款額。
35. 如果你有留意，你會成日見到撥備覆蓋率通常係有成100%、200%、300%咁樣披露嘅，即係好幾倍。
36. 表面上你好似會覺得，嘩，撥備得好足，覆概範圍超過100%、200%、300%喎。
37. 其實個百份比愈高，代表嘅一個更深層意義係，喺會計準則下嘅信貸損失粒數，高於由銀監會所定義嘅不良貸款額好多。不良貸款定100，人地預期信貸損失可以係200、300，即係不良貸款都唔準…..
38. 我成日會諗，超過100%嘅覆概率，嚴格上唔係叫覆蓋，覆蓋最多咪100%覆蓋囉，超過100%嗰啲，應該叫做係會計準則幫銀監會補番個窿。
39. 即係銀監會定義嘅良貸款額係遠遠唔夠會計準則要求下對信貸風險所作出嘅損失撥備，因為人地大過你幾部，咁認真問，睇個不良貸款金額，有咩用？
40. 坦白講，對量度銀行嘅信貸損失風險根本就無用，個不良貸款額其實係無乜義意（起碼對我呢個會計佬嚟講），因為根本損益表都唔會用你粒數。

反而我地真正要睇嘅係預期信貸損失撥備率
41. 即係預期信貸損失撥備÷總貸款額。個百份比愈高，即係代表愈保守謹慎，因為預期多啲貸款會收唔番。
42. 喺呢啲經濟下行、信貸風險整體上升嘅環境之下，撥備嘅百分比我覺得做得越多就越好啦。或者講，唔會有一間銀行可以喺同一個經濟體裏面面對嘅信貸風險特別低。
43. 同時，喺高撥備率之下所產生嘅經營利潤，相對都會更有質素，因為已經叫毫不留手地扣咗比較高嘅信貸損失撥備。
44. 咁邊間撥備率最高？建行3.43%，農行4.3%，工行2.93%，中銀2.77%。
45. 一開始寫咗，建行、工行稅前利潤都係2000億左右，但建行係整體撥備率係高過工行0.5%之下都做到2000億稅前利潤，而同一時間又做到49%利潤率。所以建行嘅利潤係更有質素同更堅實。

46. 至於，農行，撥備率有4.3%，好謹慎，但呢個撥備率真係傷到佢嘅稅前利潤，得1500億左右，而且利潤率得40%。
47. 中銀就只得2.77%，好明顯偏低，但已經偏低之餘，稅前利潤都係只得1500億左右，咁其實相對仲差過農行，因為人地喺4.3%撥備率之下同你2.77%之下一樣做到1500億稅前利潤。
48. 所以淨利息收入回報率同稅前利潤嘅質素，建行都係最好，中銀係最差。

關於內房嘅貸款佔比
49. 睇最新中期業績，內房貸款佔貸款總額，農行最多佔8.2%，有8429億，建行最少，佔3.75%，有7628億。工行佔5.9%，有7081億，中銀佔5.67%，有7348億。
50. 其實睇佔比，最多嗰間都係農行，最接近一成，係建行兩倍，不過掉番轉講，四間銀行都有超過90幾%嘅貸款係唔係借俾內房嘅，所以話要單單內房一個板塊塊攪冧四大內銀又好難。
51. 不過呢度又可以見到，如果要比較內房對內銀嘅風險程度，建行相對地算穩陣過其他三間好多。

總結

52. 如果要擔心國內經濟下行、內房危機，會唔會令到中國四大內銀都爆煲，我覺得當然無人講得準。
53. 不過如果連百業之母嘅銀行都爆煲，咁應該成個經濟嘅各行各業都唔可以獨善其身。
54. 而呢一種崩塌或者爆煲唔會係一日半日係要長時間去醞釀。
55. 反而我會擔心會更快出現嘅係如果中美衝突加劇，或者台海出現衝突，四大內銀就有可能好似俄羅斯銀行咁被美國制裁咁，唔俾用美元結算，唔俾用Swift，呢個因素對股價嘅衝擊可能來得更快更猛烈。
56. 雖然而家未去到呢個程度，但係都係行緊呢個方向所以如果買內銀想穩定收息之餘一定要留意住個中美關係局勢變化。

聲明：以上內容純屬個人意見及分享，並不構成投資、買賣建議或推薦
Credit: CFO講年報