正式進入收爐時

昨晚同兩位KOL好友吃飯,因為其中一人即將移民外地,原來大家已經兩年沒聚首吃飯,主要都是因為疫情,而當大家都有小朋友之後就更難約齊人,如回港探親仍然要隔離幾星期,相信下次要齊人再聚,恐怕要2023年了,哈哈。

大家食飯前都先碌吓手機,見到倉內美股由大急彈,再開始慢慢縮,結果大家都把握機會在開餐前減倉沽貨。朋友A提到,今年都係收爐了,好不容易來到十二月,無穿無爛,安心清貨之後上機,朋友B話都係食咗糊先,保住今年條靚數下年再算,清咗貨就可以專心飲多幾杯咁話,夜晚可以早啲瞓。大家都認同現時市場驚收水多過Omicron,青冰指出早幾日鮑威爾咁鷹,相信這個語調在今月議息前不會有改變,而今次會議係12月14至15日,距今仲有十幾日,咁都幾難挨,除非這十幾天Omicron病毒又有新的發展,而且是向差的方面發展,咁市場才會安心啲,博聯儲局即使開始收水,但都會有秩序慢慢收。換一個角度睇,其實聯儲局會議落實收水,反而市場會無咁驚,收水已成,下個目標就是加息,加息之路漫長,仍有很多變數,市場無咁快會price in加息。

吃過晚飯,青冰回到家中都有減貨,未來一個月都係進入收爐階段,以短炒為主,注碼亦要減,務求保持市場觸覺,看錯也不致太傷。

最後美股反彈得不錯,三大指數都有不錯升幅,青冰留意到一些傳統經濟股份都彈得唔錯,如DIS、BA、CRI、MGM、WYNN、LVS及COTY等等,未知是否反映Omicron的攻擊力有限,環球經濟不需再次大規模lockdown。

至於SEC亦正式通過關於外國公司問責法(Holding Foreign Companies Accountable Act),不遵守審計要求的外國公司,將會被退市,這亦是昨晚中概股普遍下挫,今日阿里巴巴(9988)、京東(9618)、網易(9999)及嗶哩嗶哩(9626)等中概股跌得特別多的原因。不過只要你記性唔太差,應該都記得相關法案在2020年美國國會通過了,其後亦經過不同機構的推進,今次來到SEC通過,只係更接近落實執行,而不是新事物,但現時市底弱,炒冷飯的消息都可以令股價再尋底,間接話你知仲未見底。假設中概股全部唔遵守審計要求,退市亦需要3年時間,不是明天就要退嘅。

種種跡象顯示,12月都不是適合大舉進攻的日子,都係出去食多幾餐飯,睇少啲更好。

聲明:以上內容純屬個人意見及分享,並不構成投資、買賣建議或推薦
Credit: 青冰投資