甚麼是財務自由?

財務自由,呢個名詞係最近呢十多年開始係香港流行,尤其是2008年開始以美國帶頭嘅量化寬鬆(Quantitative Easing,簡稱QE)之後,資產升值,拉大咗貧富懸殊,擁有資產嘅人一下子靠收息、收租已經可以過活,成為咗千千萬萬人吹捧嘅目標。而你要了解乜嘢叫財務自由,有少少名詞你要先了解。

A. 被動收入

被動收入係一種只需付出少少心機同時間去打理,就能夠定期獲得嘅收入。一般嚟講最容易接觸到嘅有:

  • 收租:包括住宅、工商鋪、土地,甚至車位。
  • 唔需要點落手做嘅生意:例如開發咗手機App之後,定期嘅收入以及自助式服務生意等等
  • 版權收入:包括影片、音樂、出版等內容上的收入
  • 網站上嘅廣告費
  • 股票、債券之類投資產品嘅利息

B. 財務自由比你想像的還要近

簡單嚟講,財務自由就係當你嘅被動收入大過日常開支,咁你基本上已經達到財務自由。假設你一個月嘅必要日常開支喺 $5,000,一年就係 $60,000。如果你一年嘅被動收入大於 $60,000,只要冇發生重大意外,你就可以唔使為錢工作都能夠生活。

喺財務自由嘅世界入面,同一般商業、會計學嘅世界有少少唔同。喺以前中學教你嘅會計知識入面,物業係資產(Asset);但喺財務自由世界嚟講,自住物業就唔當係資產喇!因為層樓係你為咗生活而買嘅,所以佢算係支出,就算層樓已經供完都好。

即係話如你本身屋企已經擁有自住物業,則你已經慳咗一筆住屋開支。如果有效控制開支的話,好似上面例子一樣,你就已經跳出咗窮忙嘅地獄,唔需要為咗明天嘅生活而做唔想做嘅工作。所以,財務自由之道簡單嚟講係兩部份:
1. 產生更多資產(生成被動收入)
2. 控制你的日常開支

注意:有好多人好鍾意強調產生更多資產,而忽略控制日常開支,咁做只會令你不停要加大自己被動收入嘅額度,雖然呢個推動力可能推到你搵到更多嘅錢,不過同時亦令你嘅財務自由目標越來越遠,要唔要咁做,就睇吓閣下嘅心頭有幾高,同埋喺物質享受同自由之間,你要如何取捨喇!

Credit: 戒窮

0 0 vote
Article Rating
Subscribe
Notify of
guest
0 Comments
Inline Feedbacks
View all comments