倉位管理 – 建立穩定獲利的交易系統

近日,收到不少巴打嘅問題,有一部分關於倉位管理同注碼分配,整合咗各位問題後,我認為今日嘅文章絕對值得所有巴打細嚼。

倉位管理,對達到穩定盈利有根本作用,而且正正係散户最容易忽視同弱項之一。今日討論嘅倉位管理內容,係我個人交易多時後嘅總結,希望對各位巴打有所啟發!

無論你基本分析,技術分析,十個PHD 學位都好,一旦你進入市場,所有嘅事前分析都係徒勞,真正決定你利潤嘅唔係你嘅分析有幾Solid,而係市場走勢,所以作為散户,唯一可以做,就係知道幾時離場,學習認輸,保護自己。

而去決定你能否係市場成功賺錢,就視乎你嘅思路同市場是否一致,正式進入今日主題 – 倉位管理。

1) 買入策略

每個人買入方式都唔同,需要根據各自有嘅資金,操作風格,市況去調節,首先,你必須了解你最想捕捉嘅形態/信號,可以係Gap後裂口不補,可以係MACD黃金交叉等技術分析指標,可以係連燈大户指數,總之你認為最舒服嘅方式做交易就可,但入場前,你嘅交易必須有呢三點:

1) 買完即升如何處理
2) 買完即跌如何處理
3) 買完不升不跌又如何處理

對我而言,只要你嘅買入點屬於自訂規則內嘅買入點,就係一個正確嘅買入點,外人完全無資格去批評對或錯,所以我從來唔會話邊個巴打買錯價,因為大家有自己嘅規則同風格,無必要用自己嘅方法去套去人地身上,所以大家可以睇書,可以吸收其他人嘅交易方法,但只可參考,完全套用往往會損兵折將,因為所有分享嘅方法都係靠佢地自己不斷嘅交易試驗同去調整改善,達到完全個人化嘅效果,所以只可參考,不可抄考。

2. 注碼分配

決定好買入規則後,只係第一步,需要有合理嘅注碼互相配合,達到風險控制嘅目的。首先,注碼分配需根據你嘅止蝕而定,實實在在嘅量化,而唔係單憑個人信念去制定。

建倉前,必須先揾岀一個止蝕點,再根據你買入價計算百分比,例子如我最近買入嘅BNGO,買入@$1.025,止蝕@$0.9,總回報為-12%,以US100K本金為例,每個交易我最多可以承受1-1.5% 嘅損失,所以我嘅注碼會係8-10% 嘅倉位,而非5%或20%。

大家必須理解一個道理,盈虧同源,當你去刻意限制你止蝕嘅空間,同樣會影響你嘅盈利,同樣BNGO為例,有巴打當日將止蝕改為$0.97離場,想減少Downside,咁樣就錯過咗後面~700%嘅行情,因為佢限制左止蝕空間,自然會失去後面嘅行情。

所以,係交易規則 (即買入價同止蝕價) 作為固定參數不變嘅前提下,你唯一可以去改變嘅參數,就係個股佔整體資金量,輸幾多錢唔係由個股跌幅去決定,而係你落注注碼去決定。

3) 安全倉位

建立好規則,理解完盈虧同源同注碼分配嘅關係後,下一步我認為最重要,就係建立「安全倉位」嘅概念。大家作為短線交易者,必須明白,資金運用效率係極度重要,所以必須掌握好建倉嘅頻率。

我真正建倉嘅方法,係由資金曲線圖走勢決定,當我建立第一個倉後,如果股票短時間內根據我嘅計劃上升,我會立即推高止蝕到一個合理水平,如股票繼續上升,慢慢推高止蝕到成本或以上,成為止賺,因此後而股價一般走勢唔會導致你輸錢,只會賺少咗。呢個情況下,第一個倉位我認為先叫做建立完成,指「安全倉位」,可以放風箏有佢運行。當擁有第一個「安全倉位」後,先可以考慮建立第二個倉,直至成為下一個「安全倉位」,不斷重複,直至滿倉為止。

呢個係我認為真正令我達到穩定盈利嘅方法,你嘅成功建立「安全倉位」的數目會話你知市場係屬於牛或熊,當你愈來愈多安全倉位嘅時候,就代表市場屬於你,當你幾次連第一個「安全倉位」都建唔到嘅時候,自然代表市場暫時唔適合你,我正正用呢個方法,避開去年年初嘅大跌,因為所有「安全倉位」一晚之間無晒,隨後無再成功建倉。

有好多人本末倒置,認為市況屬牛,所以一晚之間建立四五個倉位,不到一個星期就滿倉,恰好所有倉位未有盈利時遇上回調,整個户口一數晚無咗5-10%,例子係散户上比比皆是。認為大市會行牛市,所以不斷建倉,當中其實有預測因素,但如我所講,一旦你入場後,所有走勢都由市場決定,你事前嘅分析幾合理都好,入場後一律作廢,作為散戶,你根本唔需要去做預測,你只需要做嘅就只有執行。

所以回應到部分巴打們嘅問題,點解我長期會有20-50% 現金,原因就係我嘅「安全倉位」需要一步步建立,而且現金係不斷由其他嘅倉位止賺後而來,令我有不斷嘅現金流入。

市場就如戰場,資金如彈藥,如果你打仗一開始就所有彈藥耗盡,露晒底牌比敵人(莊家),自然會受制於人,莊家係股票上嘅舞高弄低會好容易影響你嘅交易情緒,從而做岀規劃外嘅行為,倉位必須一步步建立。

如果心水清嘅巴打,睇完應該會明白,用呢個方法,你係唔應該會有任何所謂嘅RR,目標價等等,我唔認為係最好嘅方法,呢啲全部都係有預測因素,只會限制你嘅利潤,遇到十年難得一見嘅大行情時,你已經錯失咗,盈虧同源,你止蝕嘅定價,某程度已經決定你嘅利潤幅度,所以一旦「安全倉位」成功建立,你需要做的,只係不斷推高止蝕,唔需要去預測股價幾時到頂,主動選擇止盈。

呢個方法,係我認為最有用嘅方法,只要好好利用以上方法再進行個人內化,無論你嘅技術如何,對市場了解有幾全面,一樣可以慢慢達到穩定獲利,而且不只短線,我認為中線,長線,其他市場一樣應用。

聲明:以上內容純屬個人意見及分享,並不構成投資、買賣建議或推薦
Credit: 大山貓

0 0 vote
Article Rating
Subscribe
Notify of
guest
0 Comments
Inline Feedbacks
View all comments