未來幾星期的指數Rebalancing

MSCI季檢在11月11日公佈,青冰早前在專頁都提及過,生效日會是11月30日收市後,屈指一數,今日是加人前的第五天,對於一些平時成交唔大的股份,指數基金應該會在這幾天分段吸納了。

大型股指數中,全新加入的是海吉亞醫療(6078)、中國中車(1766)、新天綠色能源(0956)及中煤能源(1898),而全新加入小型股指數的相當多,請看附圖。以中午收市價計,除了中車之外,其餘三股的現價比宣佈後還低,所以青冰早前都講,玩指數季檢,其實不需要宣佈完就即衝,還要睇返市況及本身隻股的品質,畀著以前,加入MSCI的股,即使唔大升都很難比宣佈時低咁多,可見現時港股投資氣氛有幾差。青冰如果要揀,中車應該較值博,隻股一貫都係悶,今年無乜大升,上面的蟹自然較少,但中煤及新天綠色能源早兩個月是喪炒的,全因北水,指數基金要買貨,隨時會被北水沽壓頂住,走唔得遠,海吉亞六月見過110蚊,現時累跌四成,又是蟹貨重重。

富時指數上星期五出過初步季檢的結果,主要是新股,正式公佈是在12月1日,富時指數習慣上都會在正式公佈前宣佈加入邊啲新股,可能是給予更多時間市場去消化呱。今次加入大型股的新股是時代天使(6699)及京東物流(2618),中型股是和黃醫藥(0013),小型股是醫脈通(2192)。除了京東物流外,其餘三股都在星期一有唔錯升幅,和黃醫藥升11%添。但這個富時的新聞未有太多人留意,青冰都忽略咗唔記得去check,蝕咗。其他非新股的變動會在下星期三公佈,正式生效是12月17日。青冰以前都講過,富時指數係幾個大型指數中最正氣,換言之係較易搵到食的,但現時距生效仲有一段長時間,無需要咁早作部署,但目標會鎖定是時代天使及醫脈通,尤其是醫脈通,原來佢上市後一直都反一覆上升,無乜蟹貨,而佢又係被恒生綜合指數納入了,如無意外,12月6日北水就買得,誠哥的錢難賺,所以放棄和黃醫藥。

至於恒指,正式生效日是12月3日收市後,但一直以來佢都係最難搞的指數,除非四隻新貴回調比較多,否則都不會參與,要搞的話都是以網易(9999)及京東(9618)為主,季績靚,點都少一浸沽壓,昨晚都寫過消費股入恒指的下場,所以華潤啤酒(0291)都係不要搞了。

MSCI大型股新增:
1898、956、1766、6078

MSCI小型股新增:
558、8032、6996、9990、9858、1205、2369、1952、1909、2255、1003、6830、3990、6606、606、2696、2599、580、9923、2772

FTSE大型股新增:
6699、2618

FTSE中型股新增:
2192

FTSE小型股新增:
2192

聲明:以上內容純屬個人意見及分享,並不構成投資、買賣建議或推薦
Credit: 青冰投資