宏觀經濟學原理——通貨膨脹

宏觀經濟環境之下，點解聯儲局啲人就認定要控制通脹，就只有加息、縮表？因佢地知道、相信通脹嘅根本起因就係貨幣供應嘅持續增加所致。

美元上面印咗呢句： Federal Reserve Note: This note is legal tender for all debts public and private.

即係根本就係一張紙，不過政府授權佢可以用嚟還債。信佢嘅時候，就係錢，唔信佢嘅時候，就係紙。

1. 聯儲局控制通脹，其實就係捍衛緊個美元貨幣體系。
2. 所以佢地要做嘅嘢，就係持續減少貨幣供應，控制力度、時間、再望吓個市場反應，如果通脹回落，咁佢地就可以收工，但好明顯，而家暫時未收得工。　
3. 必要時可以完全無視副作用，因為聯儲局嘅任務係捍衛美元貨幣體系，股市大跌好過美元大冧檔。
4. 就好似醫生用藥，暫時個醫學水平就係咁，佢跟住指引做，就算醫死都係指引問題。
5. 致於啲副作用就更加唔關佢事，大佬你搵得佢，就係想佢先醫好個病，副作用嘅嘢，之後自己慢慢調養啦。

6. 通貨膨脹一定係貨幣供應持續、不斷增加所引起嘅現象。要解決呢個問題就一定要掉返轉嚟做，就係持續減少貨幣供應，即係加息、縮表。
7. 你會話唔係喎，今次通貨膨脹好大原因係因為供應鏈問題，導致供應大大受到限制，供應減少，物價就上升。
8. 其實，通脹涉及好多原因，包括供應鏈問題，都會令物價上升。需求大咗，物價會上升，供應少咗物價又會上升。
9. 但我地先要搞清楚通貨膨脹嘅基本定義係講緊「物價、長時間、持續上升」。
10. 如果要符合呢個定義，就一定只有因為貨幣供應量持續增加，先可以引致。

11. 其他原因都可以引致物價上升，但如果無貨幣供應持續增加嘅助力，物價可以因某個原因而上升，但只會係一次性上升，而停留喺某個價位就會完結。
12. 如果貨幣供應無持續上升，咁就唔會再有燃料繼續俾個物價持續上升，咁就唔會形成通脹。
13. 所以，當物價上升（我無用通貨膨脹呢個term），唔係長時間持續，聯儲局就唔使太擔心，因為當國嘅貨幣穩定性無持續減弱。
14. 咁點解通脹嘅定義係要定物價持續上升呢？其實，可能你會覺得通脹嘅含意係好簡單，啲嘢貴咗，但係喺聯儲局嘅角度嚟睇，通脹嘅含意係對成個貨幣體系嘅信心造成打擊、衝擊貨幣體系穩定性。
15. 即係從另外一個角度講，通脹率呢個指標係量度緊一個貨幣體系穩定性，同埋市場對佢嘅信任程度。即係好似津巴布韋嘅情況，通脹上升20,000倍，佢嘅貨幣變即刻咗廢紙。

16. 咁你問：美元點會變成咁樣呀？當然係好難啦。但係如果唔去控制個高通脹，通脹率係會隨着市場嘅通脹預期行為，自我不斷加速到一個點，即使聯儲局狂加息都控制唔到嘅情況。
17. 因為個概念係，當你覺得嚟緊通脹會持續，即係你「預期」啲嘢越嚟越貴，咁樣你就會喺呢一刻，洗多啲錢，而家買多啲嘢；
18. 或者你係供應商，呢一刻可能你會囤積啲貨，因為你「預期」遲啲可以賣貴啲。以上呢兩個動作令到物價更加貴，通脹預期加速本身嘅通脹。
19. 呢啲都係喺通脹預期之下，對個人嚟講點樣減低通脹所引致嘅損失，所產生嘅通脹預期行為，亦都係反映緊開始對一種貨幣嘅信心減弱，當市場對一種貨幣嘅信心去到好低嘅時候，張銀紙同一張紙都唔會有太大分別。

點解一定係貨幣供應持續增加？
20. 下面我盡量簡化地講解通貨膨脹係貨幣供應持續增加而引起嘅原理：
21. 當貨幣供應增加嘅一刻（量寬），即係成個市場嘅錢多咗，錢多咗大家都身痕，想去買多啲嘢，所以需求會上升，需求上升，物價會被搶高。
22. 需求上升，即係供應商要供多啲貨先可以滿足個需求，咁佢地就需要生產多啲數量嘅貨品，咁樣佢地就要請多啲人/資源去增加產量。
23. 突然間請多啲人/買多啲原材料去增加產能，人工同原材料價格都會大幅提升，掉返轉其實係會壓抑/減少供應。
24. 因為雖然市場對貨品嘅需求，因為貨幣供應增加而上升，喺短時間內(Short Run)，供應商原本會以為佢哋可以增加產能（供應量）去capture埋呢部份突然多咗嘅需求嘅利潤。
25. 但個現實係，喺短時間內增加產能，因為市場短期資源有限，勞動人口有限，供應廠商喺短時間內增產要付出嘅代價會好高。

26. 佢哋發現咁樣去操作，個額外成本分分鐘仲高過賣呢啲額外需求貨品嘅收入，所以時間一長少少，供應商會因為觀察到短期增加供應量，成本仲高過收入，所以會減少供應（無理由蝕住做，唔知而家啲芯片業係咪有呢個情況）。
27. 但當佢地想減少番個供應，原本上升咗嘅人工同原材料成本係唔會即刻跌落嚟，因為已經搶貴咗。
28. 所以，當個供應減少番，個物價會再進一步上升。而呢個物價又再上升，會令本身因為加咗人工嘅廠商，喺供應減到（物價升到）一個程度數量後，係會再次變成有利可圖，即係總收入因為物價再上升而可以完全cover到因為加人工而上升嘅總成本。咁，個供應商就會喺呢個價位，停止減少供應。
29. 結論：需求增加會令到物價上升到一個價位，我叫佢P1，因為多咗人想要同一個數量嘅嘢，而喺呢個P1價位基礎之下，當個供應商因為生產成本高咗而減少供應，個物價會再上升（P1+）。
30. 第一次嘅貨幣供應增加令到需求增加，亦都先令供應量增加繼而又令供應減少，但係無論係需求增加，定係個供應減少，物價一定會上升。但理論上物價推升咗，咁件事就會完結，市場無形之手就會調節好個供求量同價格。

31. 如果無其他嘢發生，物價唔會再升，咁物價只係上升咗一次，而唔係持續長時間上升。
32. 但係當呢個過程完咗，因為量寛，貨幣供應其實係會持續增加，即係再一次重複point 29，每重複一次呢個情況，物價係會不斷疊加上去。增加需求同埋減少供應，物價進一步上升多幾次，就形成咗個通脹啦。
33. 咁而家啲人話根本係供應鏈緊張問題引致通脹，供應鏈緊張，即係供應有限制同減少，咁物價係會上升，市場自己會調節個物價同產出量，咁物價就會有一個新嘅價位，理論上就完咗件事啦。
34. 但係物價上升左，貨幣供應又持續增加，即係需求方面繼續增加，咁先至令到件事唔會完結，物價持續上升。供應鏈緊張係會推升物價，但係如果無持續增加嘅貨幣供應，供應鏈問題引起嘅物價上升，係會喺某個價位而停止嘅，而呢個物價上升，都唔係對一國貨幣嘅信心減低所引致嘅。
35. 最近，美國政府打算減關稅，係咪可以控制通脹？可以講呢個措施係會對呢一刻嘅物價，有一個舒緩作用，但係佢呢個措施，第一，減極有個限度，第二，只要point 29嘅情況持續，咁個通脹都係會繼續向上。

36. 個結論係：通貨膨脹要解決，一定係控制持續減少貨幣供應，而持續減少貨幣供應一定係加息、縮表。
37. 聯儲局要做嘅嘢唔係淨係壓低呢一刻已經發生咗嘅通脹率，而係要實實在在、非常堅決話俾個市場聽，佢一定會不惜任何代價，控制到個通脹，消除市場對未來嘅通脹預期。
38. 因為，聯儲局而家真正要對抗嘅係通脹預期，即係市場覺得個物價會繼續上升。
39. 呢個喺另外一個角度睇，就係話聯儲局要捍衛市場對美元貨幣嘅信心，市場對美國有通脹預期，掉返轉講即係話對美元嘅購買力或者美元體系嘅信心開始質疑。
40. 如果你從呢個角度睇通脹，你會明白點解聯儲局嘅最重要功能就係維持美國喺2%低通脹率，其實就係要佢捍衞緊個美元體系。

41. 如果從呢個角度睇，你就知係幾大鑊，即係話市場所恐懼嘅加息、縮表力度、時間會再加重、加長，咁對個經濟發展係有抑壓性，對股市都嘅打擊就會又變得非常不可確定。
42. 而家華爾街擔心嘅係聯儲局嚟緊嘅加息會唔會由0.5%加到0.75%或者甚至係1%。絕對有可能，聯儲局做緊嘅嘢就係要維持美國貨幣信譽，喺佢未去到一發不可收拾嘅時候，就要完全將呢個質疑消除，咁佢可以加速做嘅係咩呢？

聲明：以上內容純屬個人意見及分享，並不構成投資、買賣建議或推薦
Credit: CFO講年報