市埸幫你揀強勢股

青冰不只一次寫過,同類型的股份,永遠是揀龍頭優先,傳統智慧說龍頭股通常都係率先破頂,最後倒下,但投資上有一種追落後的習性,青冰都不敢說自己可以完全戒掉這心魔,但當有得揀的時候,盡量都會提醒自己,不要貪平買落後股,最後可能換來一肚氣。

但問題來了,有些概念股,其實大家都不分上下,又或是自己道行未夠,分不出誰是龍頭,在一堆同類型的股份中,應如何選擇呢?其實答案很簡單,只要經歷一個調整,然後市場就會給你答案,只是有時候,我們排除不了心魔,不肯相信而已。

以元宇宙概念作例子,當初青冰揀了三隻概念股,Roblox、Unity Software及Matterport,經過詳細分析,很容易就理解到,Roblox的元宇宙屬性最高,青冰覺得佢最正宗,但不同人會接觸到不同的資訊,睇法亦截然不同,可能會覺得Matterport及Unity Software最有潛質,Roblox就是較虛無縹緲。不過經歷了這兩星期的洗禮,元宇宙股衝高回落,然後又跟巨型科技股一齊反彈,以反彈幅度計,Matterport跟Roblox一樣反彈兩成,Unity Software就只有15%,但股價跟高位比,Roblox只從高位回落了12%、Matterport及Unity都回落近三成,換言之,Roblox是跌得少彈得快,其餘兩者就插得深彈得相對少。市場資金給予大家最好的答覆,就是用資金投票,跌下來之後會積極撈的股,自然會跌少啲啦,縱然青冰覺得Unity技術層面遠勝Matterport,但其實市場認為,兩者都係差唔多料啫。

講起晶片,自然會想起NVDA、TSM、ASML及AMD,前三者青冰都買過,但近來坐實的,只剩下NVDA。年初有玩過TSM,獲利幅度都唔錯,但自從年初看到產能已達樽頸,股價從高位回落,便急急腳走人;至於ASML,青冰自600蚊已經想買,但沒付諸實行,一直升至近900蚊才回頭,幸運地在9月尾美股急調整,當時只撈到兩隻股,ASML正是其一,但結果坐了個幾月,都未能破頂,所以分階段撤出,轉投元宇宙;NVDA是元宇宙的核心,11月頭爆升後耐心等,直至股價跌穿300美元才出手撈,現時仍然持有。

經歷近兩星期的波動,市場資金都幫青冰揀咗最值得坐的晶片股,NVDA跌得急彈得快,現時距頂位約一成,ASML在早前NVDA破頂時,都跟唔到破頂,今星期的反彈未能企穩800美元,青冰解釋唔到點解咁弱,但解釋唔到係無問題的,相信市場就夠了,至於TSM,近半年來好像點了穴,在110至130美元游走,近半年就好似跟科技股脫了節,做代工估值較低係好易理解,但長期積弱,就不是咁易理解了。

從股價看誰最強勢,其實唔難,但當自己坐住一隻同行的落後股,總會為落後股編織理由,只係時辰未到啫,有時的確係可以等到「追落後」,但青冰在港股多年的經驗是,追落後通常都係尾水,等得到反而未必好,因為可能就快炒完喇。

附圖是晶片股全年回報及第四季回報,元宇宙三股就是第四季回報。



聲明:以上內容純屬個人意見及分享,並不構成投資、買賣建議或推薦
Credit: 青冰投資