最正宗元宇宙概念 – Roblox

人稱元宇宙第一股的Roblox,坦白說青冰又係一個月前完全唔識的,跟住開始睇投行報告,然後再回想早幾個月,聽聞女兒的同學仔日日打同一隻「益智」遊戲,原來元宇宙根本就在身邊,只是自己未跟得上潮流,未有察覺而已。

若說VR及AR是代表了硬件,那Roblox就代表了軟件內容生態,Roblox在今年三月才上市,可謂相當合時,以前專注2D教育平台,走到今日的3D遊戲平台,有社交網絡平台,有3D遊戲,有自己的遊戲貨幣,可以在虛擬世界內搞生日會,叫朋友參加,更加搞過虛擬演唱會,同Prada聯乘在遊戲內有件虛擬靚衫,即使青冰還未開始介紹Roblox,戰友應該都feel到處處都是元宇宙元素。

首先介紹兩個新學懂的英文詞,UGC及PGC。UGC是User-Generated Content,PGC是Professional-Generated Content,顧名思義,UGC就是用家可以自行開發遊戲,門檻較低,較易上手,但品質就相對粗糙,但由於成本較低,開發遊戲的用家必然多,所以創意無限,內容多樣化,如果戰友有睇過Roblox的遊戲,就見到啲人物全部起晒角,成個Lego人咁樣,青冰初次看到,感覺就似N年前打紅白機咁,但N年後的今日,青冰仍然覺得當年的遊戲性及創意,比現在更佳,在PS5打FF,畫面梗係靚爆啦,但諗返以前紅白機及超任年代,那些RPG真係令人廢寢忘餐的。至於PGC,就是專家開發的遊戲,門檻高,真係要專業的軟件,有一定程度技術才可駕馭,專家的畫面自然又靚又精細,但成本當然較高,而Roblox及Unity Software,就是兩邊的代表人物。

附圖可以看到Roblox的幾隻熱門遊戲,作為PS派系的多年玩家,睇到這些遊戲的確係唔開胃,嘩起晒角咁,但從上周公佈的Q3業績看到,現時Daily Active Users(DAUs)有4730萬人,比起兩年前升咗近兩倍,13歲樓下的玩家佔了近半,青冰第一次睇到呢啲數字就諗,這班細路咁細個已經習慣(沉迷)這個虛擬世界的遊戲,過多幾年隨著他們長大,課金力一定更驚人,前途未可限量。

玩家創造了一個虛擬人後,可以設計唔同的做型及扮相,相約朋友(或網友)一齊去玩遊戲,釣魚/賽車/行Gucci虛擬店,甚至你可以設計一個自家遊戲同朋友一齊玩,如果隻遊戲熱爆,仲可以賺到遊戲貨幣Robux,可以用Robux去買賣道具,又或者用Robux去玩其他遊戲,如果日後Robux可以發展成為虛擬貨幣,就更加不得了。

近期國內及本港的一些遊戲公司,都跟元宇宙拉上關係,但是否識整隻game就係元宇宙呢?青冰覺得最重要的還是社交平台,睇過一個投行報告,指Roblox的用戶每日都會在社交平台發61條信息,比起Whatsapp的用戶每日平均數還要多。青冰都打過手遊,但跟志同道合的人一齊玩,用的通訊方式都是用line,不會跟素未謀面的人因打機而用whatsapp吧,好喇打完一隻game,那些網友都未必會再有密切聯繫,打另一隻手遊,可能就認識另一班人,周而復始。Roblox因為有一個社區,打完呢隻再打另一隻,都用同一個社交平台,都係那些網友(朋友),個凝聚力完全唔同。

對於Roblox,好像寫了很多,但其實更多都是未有篇幅再寫,在此作簡單總結。即使那些VR/AR裝置要多三幾年才大行其道,但其實完全無阻Roblox的發展,有裝置令自己身在3D環境中,當然更正,但元宇宙的核心,青冰覺得係虛擬世界虛擬社交,有了這個框架,有龐大的社交平台及活躍用戶,就有更多賺錢變現的可能性,現時只有Gucci同佢哋癲,難保日後會有更多知名品牌,NFT可以咁癲,Rivian可以未量產都成為全美第二大市值車廠,相對於Roblox,青冰真係覺得係好貼地好實務的一間公司,在中港最正宗的元宇宙是騰訊(0700),在美股,青冰覺得就是Roblox。

聲明:以上內容純屬個人意見及分享,並不構成投資、買賣建議或推薦
Credit: 青冰投資