軟銀用預付遠期合約減持巴巴 (上)

阿里巴巴(9988)的股東軟銀宣佈，早前跟幾間投行訂立的預付遠期合約Prepaid Variable Forward Contract(PVFC)將會提前股份結算，涉及2.42億股ADR，因每股ADR等於8股普通股，大約是19.36億股普通股，約9%的股本，減持後軟銀仍持有14.6%股權。有關股份結算會在8月中開始進行，預料在9月底前完成，軟銀預期交易對手(即投行)不會導致向市場出售任何股份，因投行在交易時已作對沖。

19.36億股普通股，以今天收市價87.95元計，市值約1700億港元，這個減持金額跟南非股東在2018年及2021年沽售騰訊(0700)的銀碼相若，南非股東就分兩次，軟銀就一炮過，不過正如通告所講，有關的衍生工具交易，在交易時已會作對沖，當然啦投行會對沖幾多就唔會話畀大家知，但千七億的交易，絕不可能同你完全對賭坐晒佢，而且亦會不時進行動態對沖，日日做或者隔幾星期做一些調整，所以這個交易的結算雖在8月中至9月尾進行，對阿里巴巴股價的影響應不會太大，

其實這個預付遠期合約的交易，在幾星期前已有新聞提及過，但傳媒大致都只提及預付遠期合約及變相減持，似乎就沒觸及究竟這些甚麼合約，今次青冰就略作介紹。

若拆開預付遠期合約來看，其實軟銀就是買了一個認沽期權(Long Put)，然後再沽了一個認購期權(Short Call)，這個期權策略是叫Collar，無錯，係跟香港的新晉女子組合一樣名字的，但叫得做預付遠期合約而不是Collar，性質上當然有不同。

先說Collar，這個並非艱深的策略，去年底青冰玩元宇宙股RBLX，也分享過類似的策略，由於持有RBLX已有較豐厚的盈利，但對於這類波動大的股份，要保住盈利，買個Put作保險都正路，因為前題是絕對唔想輸返轉頭畀佢，所以就會買一個價外(如比現價低5至10%)的Put，不過既然波動大，引伸波幅自然高，即使是較價外的期權，但期權金亦會較高，為了減低所付的成本，青冰就Short Call，行使價就近啲，收返一些期權金，當補貼支付Long Put的期權金。Put的行使價愈近現價，期權金自然愈高，保障也會較好，價外10至15%的Put固然會平好多，但跌起上嚟你就要硬食多啲，跌到價內才有Protection，同樣地Short Call的行使價愈近，收期權金梗係多，但萬一升起上嚟，要犧牲的潛在盈利就會更多。所以整個Collar是要畀多還是少，完全由自己決定，付出多一點，保障好一點。

Collar的操作，主要是要付期權金，亦都可以收錢嘅，你Sell 1%價外的Call，Long 10%價外的Put咪有錢落袋囉，但都係嗰句，你付出少一點(或者係收錢)，保障就無咁多囉。而預付遠期合約跟Collar最主要的分別就是，在結算時只要股價在Put及Call的行使價中間，Collar就無需有股票交收結算，你仍然持有該批股份，而預付遠期合約，投資者會先收一筆金額(通常是現價市值的七成至九成錢)，好似投行預先借錢畀你但未交收股份，到結算時就會有股票交收，換言之是必定會減持的。

為了更清楚的理解預付遠期合約的運作，還是用一些數字去解釋較佳，但為免篇幅過長，實際例子留返明天再寫。
軟銀用預付遠期合約減持巴巴 (下)

聲明：以上內容純屬個人意見及分享，並不構成投資、買賣建議或推薦
Credit: 青冰投資