解讀Tesla 2022Q3業績:收入、產銷量創歷史新高

Tesla近期股價的確弱,第三季業績收入、產銷量創歷史新高,市場唔收貨,因為Q3收入低於市場預期,又meet唔到2022全年銷量增長50%目標。 坦白講佢基本面、經營質素我又覺得冇乜問題,只係我睇到佢最近轉變緊一啲策略,的確令佢表面上好似差咗,令股價有所掙扎。

再加上加息周期、衰退預期,Elon Musk又要買twitter可能賣Tesla股票籌錢,呢啲非自身經營因素造成近期低位。

Tesla 2022Q3業績解說
1. Tesla Q3收入有214.5億美元(下同),同比增長56%;汽車毛利率27.9%,低過上年Q3嘅30.5%;經營利潤率有17.2%,就高過上年Q3嘅14.6%。
2. 市場預期佢收入會有219.6億。我諗市場好可能係無預佢Q3平均車價環比減5%,由Q2嘅$57,000減到Q3嘅$54,000。
3. 所以如果按Q2平均價計,佢Q3收入係可以做到224.7億,輕鬆beat the market expectation。
4. 另外,以銷量計,Q3比Q2係升咗成35%。你話Q2有上海封城,影響產銷量,基數低,所以Q3一定大升。
5. 不過留意番,呢個Q3銷量本身就係歷史新高,就算同正常啲嘅前歷史高位2022年Q1、2021年Q4比,都分別上升咗10.9% 同11.4%。所以睇產、銷量,Q3其實係做得好好。
6. 產、銷量創新高,一來係上海車廠嘅ramp up已經漸趨成熟,年產量由65萬架提升到75萬架,二來似係Elon Musk 對提升產銷量嘅策略轉變,減價有機會成新趨勢。

策略轉變、毛利率連績兩季一樣係巧合?
7. 有無留意,Q3汽車毛利率27.9%係完全同Q2嘅27.9%一樣,真係咁橋?邊有咁多巧合,我會覺得Q3嘅汽車毛利率係望住Q2嚟做嘅。
8. 因為4、5月上海封城,Q2產能白白就咁浪費咗3份1。對Elon Musk嚟講係好慘痛。一來令佢達唔到年初定全年做150萬架車、同埋銷量年增長50%以上嘅目標。
9. 二來望住中國主要競爭對手比亞迪產銷量下下都100%、200%咁樣升,好似完全唔受疫情影響咁。咁佢一定都喺想2022下半年短時間內谷起個產、銷量,追番浪廢咗嘅產能。
10. 谷個產量,就一定係chur爆自己間廠嘅員工、增加輪班;而chur爆個銷量,如果無新性能、新車型供應,短時間內谷起最有效嘅一定係減價,呢個就係我所講嘅佢策略轉變。
11. 咁谷幾多銷量?減幾多價呢?銷量上升當然無底線,多多都歡迎,但減價一定有個譜。一減價毛利率會跌,可以跌幾多?當然最起碼唔可以低過Q2啦,因Q2係差嘅,但特殊情況。
12. Q3正常番,如果個毛利率仲低過Q2,會說不過去,所以佢地減價嘅control point就係望住27.9%呢個毛利率嚟減。
13. 當然Q3產量大升,本身係大大拉咗低平均成本,所以如果唔減價,除咗point 3講嘅收入meet到市場預期外,Q3汽車毛利率仲可以去到31.6%,即係歷史第二高;而經營利潤率係可以去到20.9%, 創歷史新高。
14. 但如果想再谷多啲銷量,就要減價,減幾多?5%倒,就啱啱唔會穿Q2嘅27.9%毛利率。所以兩季都27.9%,係為谷銷量而最大化使用咗可減毛利率空間。
15. 所以成件事嘅策略就係狂谷產量,每架車平均成本會降低,毛利率就會上升,做成可以減價嘅空間更大,於是就可以減多啲價,從而再提升銷量。呢個係Q3做緊嘅策略轉變。
16. 比亞迪產、銷量雖然下下100%、200%增加,但毛利得嗰13%、14%,扣埋費用純利率得1%、2%。
17. 但Tesla真係唔怕減價犧牲少少毛利率,佢本身就已經可以做到30%以上,係電動車全行最高,就算一季減5%價,毛利率都keep到27.9%,經營利潤率都有17.2%,大把空間同比亞迪鬥。
18. 所以今日,即係已經Q4啦,Tesla喺中國仲減緊價,介乎唔同車型5%-9%嘅,好明顯係想趁今年最後一季勁谷銷量,年尾好好睇睇。聽講引發用舊價已經買咗Tesla嘅車主不滿同抗議。

Q3產量賣唔哂
19. 所以Q3產量都真係出盡奶力架啦,但銷量係要配合市場嘅需求,最後做成罕有地Q3產量大過銷量成6.4%
20. 以往每季產銷量嘅差異都係1%左右,而且通常係銷量大過產量,但係Q3同埋Q2都係產量大個銷量。
21. 而且Q3產量仲要大過銷量6%,好明顯係老細Elon Musk屌鬼:「我而家要full speed 谷產量,唔使理賣到幾多,賣唔到,減價咪得囉!」
22. 產量full speed 自己控制,銷量就減價谷爆,但始終唔可以低過Q2毛利率,減極有個譜,所以真係賣剩咗6%。 其實咪就係以前幾季做得太好囉,想減價都唔係好似比亞迪咁輕鬆。
23. 但呢個都無傷大雅嘅,一季生產得越多代表產能使用率越高,平均成本就會降低,呢6%貨去到Q4賣都係完全冇問題。調返轉如果呢6%冇喺Q3生產,Q3平均成本就會高咗,而且Q4嘅產能就會追少咗6%,而家係追產量,所以點都喺Q3生產咗先好。

通脹削減法案
24. 呢個法案係想以提供稅務優惠,去推動美國電動車普化及生產鏈去中國化。由2023年開始,逐年由美國同北美伙伴生產、組裝電池同零件嘅比例要求續漸提高,車價又要低於約5萬5一部,就可以享有每部7500美元稅務抵免優惠。
25. 有分析話呢個法案會對Tesla嘅銷售有好大幫助。坦白講,呢個措施未必短期對Tesla銷量好有幫助。因為要一下子全部轉走哂中國嘢好難,而家電池材料根本就係供不應求,你仲點可以叫電動車廠商一下子唔用中國貨?
26. 所以法案都只係逐年增加比例,係長遠推動去中國化;同時點解Tesla CFO都只係講有信心可以達到法案要求,但就要等年底睇睇法案仔細條款先可以完全掌握合資格條件,即係佢地係有保留。

Q4業績方向
27. 有時經營得太好,市場就會對你要求好高,差咗少少都會唔收貨。
28. Q3業績表面好似走弱,收入不似預期,毛利率又無升幅,其實實質佢係好有優勢去調整價格、從而調整收入、毛利率同銷量。攪完一輪,產銷量、利潤率依然全行最高。
29. 我覺得都幾大機會Tesla Q4嘅業績會好亮麗,雖然毛利率唔會高得去邊,因為Q4中國嗰邊會繼續減價,美國又可能因為新法案未必會可以加到價。
30. 但上海車廠、德州車廠ramp up應該會更有效率(柏林可能因為能源問題有少少阻滯,聽CFO記者會口吻),再加上歷史上Tesla每年第四季產銷量都係比頭三季好,又有減價促銷;最緊要Elon Musk喺記者會講明: we are extremely confident of the great Q4。
31. 所以我覺得Q4銷量好大機會再創新高,雖然毛利率唔會大幅提升,但一定保持到,Q4嘅收入同經營利潤都好有機會創新高。

Q3業績連結:
https://tesla-cdn.thron.com/static/WTULXQ_TSLA_Q3_2022_Update_KPK2Y7.pdf?xseo=&response-content-disposition=inline%3Bfilename%3D%22tsla-q3-2022-update.pdf

聲明:以上內容純屬個人意見及分享,並不構成投資、買賣建議或推薦